Patay ang 50 anyos nga lalaki nga nagapautang sang 5/6 sa syudad sang Escalante City, Negros Occidental matapos ginluthang sang apat ka wala makilalal-an nga mga suspetsado.
Suno kay P/Lt Rocky Desear, hepe sang Escalante City Police Station, ang biktima ang ginkilala kay Wilfredo Turno, 50 anyos residente sa Barangay Balintawak sa syudad sang Escalante.
Nahibaluan nga si Turno nga nagamaneho sang motorsiklo kag ang iya nga bata nga nagamaneho sang tricycle ang nagikan pa sa banwa sang Toboso kag ginsundan sila sang apat ka suspetsado tubtob magdangat sa Escalante City kun sa diin siya ang ginluthang.
Ang apat ka suspetsado ang magkapares naman nga naga-angkasanay sa duha ka motorsiklo.
Ginpahayag sang bata sang biktima sa mga kapulisan nga nakabati ini sang lupok kag nakita nalang nga natumba ang amay.
Sa pagkatumba ni Turno ginpalapitan pa ini kag gintadtad sang tiro sang mga suspetsado.
Gilayon naman nga nagpalagyo ang mga suspetsado nga nakabonnet, facemask kag helmet.
Sa karun wala pa sang matumod nga motibo ang mga kapulisan sa pagluthang sa biktima apang ginalantaw na sang kapulisan nga wala ini sang kahilabtanan sa iya nga trabaho.
Dugang pa ni Desear nga apisar nagapanginwala ang bata nga kilala nya ang naghimo sang krimen, nagapati ini gihapon nga may ginatago pa nga impormasyon ang bata.
Nakuha gikan sa crime scene ang walo ka empty cartridge sang .45 caliber pistol.
