Nagdangat sa 50 ka mga balay ang totally damage samtang apat naman ang partially damage sa nagluntad nga sunog sa Purok Pasil Brgy Zone 5, Talisay City, Negros Occidental, kahapon sang hapon.
Sa interview sang Bombo Radyo Bacolod kay Senior Fire Officer 1 John Stewart Mondido, Fire Arson Investigator sang Talisay City Fire Station, ang sunog ang nagluntad sa tunga nga bahin sang Sitio Pasil kag ang balay nga ginhalinan sang kalayo ang nagikan sa balay ni Phoebe Ann Pasilan.
Suno kay Mondido, wala pa nila matumod kun ano ang ginhalinan sang kalayo nga nagtuga sang nasambit nga sunog.
Nagdangat naman sa P525,000 ang estimated nga balor sang damage sang nagluntad nga sunog.
Madamo naman ang naapektuhan bangud ang mga balay ang ikit ikit ukon congested ang lugar.
Nagpanugyan man ini sa mga pumuluyo nga mag-aligmat pirme agud malikawan ang pagluntad sang sunog.
Samtang ginpahayag naman sang pinuno sang City Social Welfare and Development Office nga nahatagan naman sang bulig ag mga nasunugan.
Suno kay Dionela Madrona, nakahatag na sang food packs ang Angel Wings foundation kag napakaon naman ang mga nasunugan.
Suno diri, ang totally damage ang makabaton sang P7000 cash assistance samtang ang partially damage ang P5000.
May cash for work naman ang ciudad kun sa diin ang mga nasunugan ang mapatindog sang puluy-an kag bayaran ang ciudad bilang bulig sa mga ini.
Nagpanawagan man ini sa luyag nga magbulig nga mahimo lamang makapadulong sa covered gym sang Barangay Zone 5 agud mahatag an bulig.
