50 ka mga tricycle ang gin-impound kahapon apisar nga wala sang full operation gikan sa Task Force Kontra Colorum bangod sa delay nga pag-abot sang IDs sang mga volunteers.
Sa interview sang Bombo Radyo kay Bacolod Traffic Authority Office Head Police Major Junji Liba, wala naka fully operate ang Task Force Kontra Colorum kahapon bangod sa delayed nga pag-abot sang mga IDs sang mga volunteers nga miyembro sang task force.
Apang, sa pag-operate sang organic members sang BTAO kag 46 ka mga volunteers, natigayon nga ma-impound ang kapin 50 ka mga nagabyahe nga colorum ilabi na sa palibot sang Libertad Public Market.
May multa nga P1,500 ang nadakpan nga colorum, P300 sa wala sang lisensya kag P300 man para sa wala sang OR-CR, nga sa karun may yara naman sang nakagawad sang ila unit.
Suno kay Liba, dako ang bulig sang pagdakop sa mga colorum para sa mga nagabyahe sang legal nga mabuhinan ang mga tricycle nga nagalibot sa siyudad kag wala na sang kaagaw sa pasahero ang mga lisensyado nga drayber.
Mensahe sini para sa mga tricycle drivers nga nagabyahe sang colorum nga may choice ang mga ini nga mag-untat ukon magpadayon, nga suno kay Liba kun magsige sila sa pagbyahe, indi mag-untat ang BTAO sa pagdakop sa mga ini.
