Nakapauli na kahapon ang 50 ka mga Negrense nga gin-repatriate sa probinsya matapos makompleto ang 14 ka adlaw nga mandatory quarantine sa isolation centers.
Sa interview sang Bombo Radyo Bacolod kay Dr. Zeaphard Gerhart Caelian, PDMPD head kag pinuno sang humanitarian cluster sang Negros Occidental ginpahayag sini nga may yara pa sang pending nga 18 ka mga swab results agud masiguro man nga wala sang dala nga virus bangud may mga travel history abroad.
Nagikan sa 68 nga kabug-usan sang mga repatriates, 50 pa lamang ang ginpasugtan nga makagraduate agud makapauli man sa tagsa ka mga puluy-an.
Ang 50 ang nagnegatibo man sa Covid 19 test.
Ginpaidalom man ang mga ini sa rapid testing antes pa nagsulod sa Mambukal Resort kag sang naggwa na ang mga ini.
Gilayon man nga igarelease ang 18 ka mga nabilin sa tion nga mag-abot ang resulta sang swab test kag negatibo lamang ini.
Ginkompirmar man sini nga may yara pa sang nabilin nga mga naka-quarantine sa Mambukal resort apang sa tion nga mabakante na ang mga ini ang mahimo na sila maka-arrange sang sweeper flight.
Nalipay man ang ini bangud makaupod na ang tagsa ka pamilya.
Kalabanan sang mga ini ang stranded Negrense kag pila diri ang mga OFW.
Ginhatagan man ang mga ini sang quarantine clearance certificates kag nakakuha man ang mga ini sang pasalubong.
