Nagdangat sa 50 ka mga prank calls ang nabaton kada adlaw sa localized 911 sa ciudad sang Bacolod.
Madumduman nga may pila ka mga reklamo sa social media angot sa delayed nga pagresponde sa emerhensya nga gintawag sa localized 911.
Sa interview sang Bombo Radyo kay Dr Anna Maria Laarni Pornan, Head sang Bacolod CDRRMO, ginpahayag sini nga natabuan nga may ginacater man nga paseynte ang duha ka naka standby nga ambulance sang natabo ang insidente.
Ginpaathag sini nga nagadangat sa 261 ka mga tawag kada adlaw ang ila mabaton kag kun mapuno na, ini ang ginasabat sang province.
Dugang pa, may yara gid sila sang nakastanby nga ambulance kag kun indi ini available, kinahanglan ang pinakamalapit nga brgy ang magresponde.
Kun indi pa gid available ang ambulance sang brgy, sila ang maga-tap naman sa volunteer groups.
Pahayag sini nga dugay na nga ginpa-remind ni Bacolod City Mayor Greg Gasataya ang mga Barangay nga magpabalo sa ciudad kun may mga problema ang ila mga ambulansya agud malikawan ang delay kun may emerhensya.
Isa man sa problema suno sa iya, kun gakapuno ang landline bangud sa 50 ka mga prank calls nga ila mabaton kada adlaw.
Paathag sini nga gina-queue ang mga tawag, gani inidi gilayon masabat ang mga lehitimo nga emergency calls bangud sa mga nauna nga prank calls.
Suno diri, pila sa mga tawag ang non-emergency kaangay sang problema sa basura kag tubig gani ini ang ila gina-refer sa 6100 nga hotline sang ciudad.
