Nalakip ang bise alkalde sang Cauayan sa 50 ka mga successful blood donors sa ginpatigayon nga bloodletting activity sang Philippine Red Cross-Negros Occidental in partnership with Dugong Bombo sa Barangay Caliling, Cauayan kaina sang aga.
Sa interview sang Bombo Radyo Bacolod kay Cauayan Vice Mayor Analiza Jing Soriano, ginpahayag sini nga blessing in disguise man ang pagpadulong niya sa Barangay Caliling bangud nadayon gid man ang iya handom nga magdonar sang dugo.
Suno sa bise alkalde, madugay na sini nga luyag magpakuha sang dugo apang indi ini kwalipikado bangud masami siya nagapulaw sa Korean dramas.
Natiempuhan naman kagab-i suno kay Soriano nga timprano pa siya nagpahuway.
Ginakalipay naman sang donor recruitment officer sang PRC-Negros Occidental nga si Eloisa Marie Liza nga nalab-ot ang 50 target blood donors.
Suno sa iya nakuha gid ang desired blood donors nga 1% sang populasyon sang Barangay Caliling.
Tuman naman ang pagpasalamat ni Punong Barangay Josel Popioco sang Barangay Caliling sa Bombo Radyo, Philippine Red Cross kag sa mga blood donors nga nagpasakop sa bloodletting activity.
Suno kay Popioco ini ang labing una nga kahigayunan nga nagpatigayon sila sang independent kag separado nga blood donation activity.
Nahibaluan nga nagapatigayon sila sang twice a year nga bloodletting activity sa ila nga barangay.
