Ginkumpirmar sang spokesperson sang Negros Occidental Police Provincial Office (NOCPPO) nga nagpanghatag sang bugas ang provincial director sang NOCPPO kag city director sang Bacolod City Police Office (BCPO) kasunod sang ila mga kaadlawan.
Sa interview sang Bombo Radyo Bacolod kay Police Captain Judesses Catalago, ang mga kapulisan ang padayon nga nagasiguro sang seguridad sang mga evacuees bangud sa paglupok sang Bulkan Kanlaon sa evacuation centers.
Suno kay Catalogo may yara naman sang mga police nga nagabantay agud nga wala sang makabalik sa sulod sang 6 kilometer extended danger zone.
Suno diri, may mga police officers man nga nagpatigayon sang nagkalain-lain nga aktibidad para sa mga evacuees apang sang nagligad nga adlaw ang nagpanghatag sang bugas amo sanday Bacolod City Police Office Director Police Col. Joeresty Coronica kag Negros Occidental Police Provincial Office Director Police Col. Rainerio De Chavez nga dungan nagasaulog sang ila kaadlawan sang tinalikdan nga Disyembre 30, 2024.
Ini agud nga makabulig sa mga naapektuhan sang paglupok sang Bulkan Kanlaon.
Nagdangat sa 50 ka sako nga bugas ang ginhatag sang duha ka opisyal kay La Castellana Mayor Rhummyla Nicor-Mangilimutan.
Ang bugas ipanagtag sa mga Internally Displaced Persons nga yara karon sa mga evacuation centers.
