Kabug-usan nga 50 ka mga successful blood donors ang nagpakigbahin sa bloodletting activity sang Philippine Red Cross in partnership with Dugong Bombo sang Bombo Radyo Philippines nga ginpatigayon sa Barangay 4, Himamaylan City.
Suno kay Dr. Anna Mae Quilantang sang Philippine Red Cross Negros Occidental, nalab-ot gid ang target nga 50 ka mga successful blood donors.
Dugang sini nga ang Himamaylan City ang isa sa mga local government unit sa Negros Occidental nga aktibo gid sa blood donation programa.
Suno pa kay Quilantang nga nalakip sa top 5 Sandugo Award sa Western Visayas ang Himamaylan City.
Ginalakipay man sini nga mahibaluan nga aktibo ang amo nga LGU sa bloodletting activity.
Tuman naman ang kalipay sang first successful blood donor nga si Ronnel Bitco sang Zone 7, Barangay 1 Himamaylan City bangud nga nakapakuha na gid man ini sang dugo sa labing una nga kahigayunan.
Suno kay Bitco, madugay na niya nga luyag magdonar sang dugo apang wala ini nagakadayon bangud nga isa siya ka seafarer kag yara sa protocol sang PRC nga dapat makatinir anay sang madugay sa Pilipinas ang isa ka OFW antes ini makadonate sang dugo.
Bangud sa COVID-19 pandemic, masobra isa ka tuig na ini nga nagatinir sa pungsod gani nga natigayon gid siya nga makadonate subong nga adlaw.
Suno naman kay Johnrei Velez, successful blood donor, daw nagtawhay ang iya pamatyag kag nalipay gid bangud nga nakadonate siya sang dugo sa labing una man nga kahigayunan.
Suno sa iya, madugay naman niya kuntani nga luyag magdonar apang bangud sa pandemic kag trabaho, indi magsanto ang iya nga schedule.
Nahibaluan nga ang ciudad sang Himamaylan ang regular nga nagapatigayon sang bloodletting activity kada bulan.
