Patay ang 51-anyos nga tricycle driver matapos mabunggo ang iya ginamaneho nga tricycle sa isa ka sako sang humay nga ginbutang sa kilid sang National Highway sa Purok Rose B, Barangay Talacagay, Hinoba-an, pasado alas-8 sang gab-i sang Lunes.
Ginkilala ang biktima sa alyas nga “Generoso,” 51 anyos, tricycle driver kag residente sang Purok Waling-Waling, Barangay Talacagay.
Suno sa imbestigasyon sang Hinoba-an Municipal Police Station, halin ang biktima sa Barangay Bacuyangan matapos nag-inom upod ang iya mga abyan kag nagpauli sakay sang iya tricycle.
Pag-abot sa lugar sang insidente, aksidente nga nabunggo sang biktima ang isa ka sako sang humay nga ginbutang sa kilid sang highway.
Bangud sini, nadulaan siya sang kontrol sa iya ginamaneho nga tricycle kag natumba sa sementado nga dalan.
Nagsustenir sang pilas sa ulo ang biktima kag gilayon nga gindala sang Hinoba-an Rescue Team sa Hinoba-an District Hospital. Apang, gindeklarar siya nga dead on arrival.
Padayon ang imbestigasyon sang kapulisan sa insidente.
