Nagapangagda ang regional director sang Department of Labor and Employment (DOLE) Region 6 sa mga nagapangita sang trabaho nga makigbahin sa Job Fair nga patigayunon sa SM City Bacolod sa Hunyo 12 kadungan sang Independence Day.
Suno kay Atty. Sixto Rodriguez, 51 ka mga local companies ang magapartisipar sa Job Fair lakip na ang Bombo Radyo Bacolod nga nagapangita sa karun sa bag-o nga mga reporters.
Suno kay Rodriguez, magluwas sa 51 ka mga local companies, magapakigbahin man ang mga ahensya sang gobyerno kaangay sang National Bureau of Investigation (NBI), Bureau of Internal Revenue (BIR), Pag-IBIG, Philippine Statistics Authority kag iban pa agud makahatag sang serbisyo sa publiko kag malikawan ang malaba nga pila sa ila opisina.
Suno diri, nationwide kag per region ang Job Fair gani nagapangagda ini sa mga nagapangita sang trabaho nga makigbahin diri.
Magapatigayon sang series of consultation ang Department of Labor and Employment Region 6 tuhoy sa ginapangayo sang duha ka mga labor organizations nga P150 across-the-board minimum wage increase.
Suno kay Atty. Sixto Rodriguez, nagpatigayon sang deliberasyon ang Regional Tripartite Wages and Productivity Board tuhoy sa veracity kag authenticity sang wage increase nga ginfile sang duha ka mga labor organization sa rehiyon.
Suno kay Rodriguez, nakameeting na ang board tuhoy sa ini nga petisyon.
Suno sa iya, sila ang nakadeliberate na kag magapatigayon sang series of consultation.
Sa Hulyo 5, ini ang patigayunon sa Iloilo kag Guimaras kag sa Negros Occidental sa ikaduha nga semana sang Hulyo.
Suno diri, consultation pa lamang ang patigayunon kag wala pa sang public hearing.
