Ginbawian sang kabuhi ang 52-anyos nga amay samtang pilason naman ang iya bata kag umagad matapos ma-igo sang kilat sa Sitio Kapaklan, Brgy Santol, Binalbagan, alas-4:45 kahapon sang hapon.
Sa interview sang Bombo Radyo kay Negros Occidental 5th District Representative Atty Dino Yulo, na-igo sang kilat ang dako nga puno sang lubi nga yara sa kilid sang balay sang mga biktima.
Naglatay sa kuryente sang ila sulod balay ang kilat.
Ang amay nga si alyas ‘Gilbert’ ang naka-angkon sang pilas sa ulo kag sa iya abaga samtang ang iya 25-anyos nga bata ang napilasan naman sa tiil.
Ang umagad sang amay ang nakaangkon sang pilas sa iya nga likod nga bahin sang lawas.
Samtang, ginpahayag ni Yulo nga may isa pa ka persona nga wala pa nakilal-an ang nasamaran.
Matapos makabaton sang report ang Kongresista natuhoy sa insidente, personal siya nga nagpadulong ospital kag naghatag sang bulig sa mga biktima.
Pahanumdom ni Yulo sa pumuluyo nga kun may matabo nga pagpangilat, kun mahimo indi na maggamit sang cellphone kag bisan ano nga eletric devices kag patyon ang tanan nga electric conductor agud malikawan ang kaangay nga insidente.
