Patay ang isa ka 52 anyos nga lalaki matapos gintiro sang anay enkargado sang isa ka hacienda sa Hda. Barrio, Barangay Santa Teresa, Manapla, Negros Occidental sang Nobyembre 14, 2026 sang aga.
Sa interview sang Bombo Radyo Bacolod kay Police Captain Marion Vincent Buenaflor, Acting Chief of Police sang Manapla Municipal Police Station, suno sa impormasyon nga ila nakuha, alas 9:00 sang aga sa nasambit nga adlaw, ginkadtuan sang suspek nga si alyas Benjie ang biktima nga si alyas Joseph nga tinawo sini sadto sa isa ka hacienda.
Suno kay Buenaflor, suno sa pahayag sang mga witness ang biktima kag ang suspek ang nag-estoryahanay pa kag ginalantaw nga may kaangtanan sa benepisyo ni alyas Joseph apang nag-init ang pagdiskusyon rason nga gintiro siya ni alyas Benjie.
Dugang pa ni Buenaflor nga ang duha nga kaupod ni alyas Benjie nga may mga armas ang nagpalupok man.
Matapos ang krimen, nagpalagyo si alyas Benjie kag duha ka mga upod sini sa wala mahibaluan nga direksyon.
Matapos ang krimen, nagpalagyo si alyas Benjie sa wala mahibaluan nga direksyon kaupod ang duha ka persona nga lunsay armado man.
Ginalantaw nga 9mm ang gingamit nga armas-luthang sa pagtiro sa biktima bangud sa mga fired cartridge nga nakita sang mga kapulisan sa lugar sang krimen.
Suno pa sa hepe, upod ang nakakilala sa suspek ginpadulungan sang mga kapulisan ang pamilya ni alyas Benjie sa Cadiz Viejo kag naestorya ang asawa nga estoryahon ang bana sini nga magsungka na bangud may witness nga nakakita nga ini ang nagtiro-patay kay alyas Joseph.
Sa karun padayon ang pagpangita sang mga kapulisan sa suspetsado kag padayon man ang imbestigasyon sa nagluntad nga shooting incident agud nga matumod ang motibo.












