Arestado ang isa ka 52 anyos nga lalaki matapos nakit-an sa scanner sa BREDCO Port sa ciudad sang Bacolod nga may dala ini nga armas-luthang nga wala sang lisensya kaina sang aga.
Ginkilala ang arestado kay Llywyllynn Timbad sang Barangay Poblacion, Barotac Viejo, Iloilo.
Nagikan sa probinsya sang Iloilo si Timbad kag nagpadulong sa Bacolod agud nga magtambong sa lubong sang iya nga himata kag papauli na kuntani ini kaina sakay sa fastcraft.
Narecover sa iya possession ang isa ka .38 caliber revolver nga may duha ka bala.
Sa interview sang Bombo Radyo kay Police Capt. Felimon Espinosa, pinuno sang Bacolod Maritime Police, istrikto ang pag-usisa sa mga bagahe sa BREDCO Port gani nakita sang gwardiya sa X-Ray machine nga may armas ini nga dala sa iya nga backpack gani siya ang gin-aresto.
Suno diri, mahimo nga sa Bacolod naghalin ang iya armas-luthang bangud patabok na ini.
Sa karon, ginahanda na ang kaso nga iga-file batok sa arestado agud makit-an sang mga pumuluyo nga hugot ang seguridad nga ginapatuman sa pier gani likawan nila ang pagdala sang ginadumilian nga butang.
Ang kustodiya kay Timbad ang igapasa sa Bacolod Police Station 2 samtang natalana naman ini nga ipaidalom sa inquest proceedings.
