Patay ang 52 anyos nga mangunguma matapos ginluthang sa Sitio Proper, Barangay Cabcab, Isabela sang kaupod sini sa ilimnan.
Sa interview sang Bombo Radyo Bacolod kay P/Capt Dante Balenario, deputy chief of Police sa Isabela Municipal Police Station, ang biktima ang ginkilala nga si Jose Ebien, 52 anyos residente sa lugar samtang ang suspetsado amo si Reynante Marfil, 33 anyos, laborer, residente sa Sitio Mansandog sa nasambitan man nga Barangay.
Suno kay Belanario, magkaupod sa pag-inom inom ang biktima kag ang suspetsado tubtob nga sila ang wala naghangpanay gani ginpapauli ni Marfil ang biktima.
Apang sa paglakat ni Ebien, ini ang ginsunod ni Marfil kag ginluthang gamit ang home-made 12 gauge shotgun ukon sulpak.
Nakaangkon naman sang igo sa lawas ang biktima nga gintunaan sang gilayon nga kamatayon.
Santo sa inisyal nga imbestigasyon, ang karbaw nga anay ginbantayan sang suspetsado ang ginbawi sang tag-iya kag ini ang ginpasa sa biktima.
Gani isa sa ginalantaw motibo sa krimen amo ang paglainay sang buot.
Ang suspetsado ang nahibaluan nga may-ara daan nga kaso sang homecide, samtang wala naman sang record sa kapulisan ang biktima.
Sa karun ginahulat na lamang ang death certificate sang biktima agud mafile na ang kaso nga murder batok kay Marfil nga yara sa karun sa kustodiya sang Isabela Municipal Police Station.
