Nag-abot na ang 52 ka mga returning Negrense overseas Filipino workers (OFWs) kun sa diin kalabanan sa mga ini ang seafarers sa Bredco port pasado alas-8:00 kagab-i.
Sakay sa MV St. Leo the Great nga roro vessel ang 24 ka mga taga-Bacolod City kag 28 naman nga taga-Negros Occidental.
Gilayon nga gindiretso ang mga taga-probinsya sa healing center sa banwa sang EB Magalona samtang gindala naman sa Graciano Lopez Jaena Elementary School ang mga taga-Bacolod para sa mandatory 14-day quarantine.
Sa interview sang Bombo Radyo Bacolod kay Councilor Israel Salanga, chairman sang Action Team on Returning OFWs, ginpasalig sini nga apisar napaidalom na sa rapid test ang mga nagpauli nga mga Bacolodnon, kuhaan sila sa gihapon sang swab sample agud masiguro nga indi ang mga ini infected sang virus.
Samtang, tuman naman ang kalipay sang magulang sang isa sa mga seafarers nga taga-Escalante City.
Naghulat gid ini nga makapanaog sa barko ang iya utod apisar nga indi ini makapalapit didto bangud ang importante suno sa iya nga nakapauli na ang iya manghod.
Suno diri, Marso 18 pa sang nag-abot sa Manila ang iya utod kag nagatinir lamang ini sa hotel nga ginprovide sang kompaniya.
Nagatrabaho sa cruise ship ang iya manghod nga nagabiyahe sa Middle East.
Nahibaluan nga taga-ciudad ini sang Bacolod gani nga nakakadto ini sa Bredco port agud masaksihan ang pagpuli sang mga returning OFWs kagab-i.
