Patay ang 53-anyos nga lalaki matapos ginluthang sang wala pa makilal-an nga mga persona sa Rosario Mabini Street, Barangay 38, Bacolod City pasado alas 7:00 kagab-i.
Ginkilala ang biktima kay Rowy Senador alyas Junjun, residente sang Barangay Alijis, Bacolod City.
Sa initial nga impormasyon, nagikan ini sa Barangay 14 kag papauli na kuntani sa Barangay Alijis sang may nabatian nga tatlo ka lupok ang mga residente sa lugar.
Antes sini, ginaalegar nga may nagasunod nga motorsiklo sa biktima.
Sa interview sang Bombo Radyo kay Leizel Senador, asawa ni Rowy, gin-ako sini nga madugay na nga nagaduso sang illegal nga druga kag nagabaligya sang shabu ang biktima kag una na ini nga nadakpan sa pagbaligya man sang marijuana.
Suno kay senador, iya man ini ginasaway sa buluhaton kag wala ginasalig ang ila pangabuhian diri bangud nagabaligya man siya kag nagapangmanicure agud makakwarta.
Suno sa iya, nakahibalo ini nga may sala man ang iya nga bana apang daw indi niya gihapon mabaton ang natabo.
Sa karun nagapadayon pa ang imbestigasyon sang kapulisan tuhoy sa motibo sang krimen kag identity sang mga suspetsado.
