Patay ang 53 anyos nga mangunguma sa banwa sang EB Magalona, matapos ini nga ginkuha sang anom ka mga wala makilala nga mga kalalakinhan kag gintiro.
Suno kay P/Master Sgt. Konnan Tampos, imbestigador sang EB Magalona Municipal Police Station, ang biktima ang ginkilala kay Dionesio Labado Jr, 53 anyos kag residente sa Sitio Tabuan, Barangay San Isidro, EB Magalona, Negros Occidental.
Sa inisyal nga imbestigasyon, nahibaluan nga sang Sabado sang hapon may tatlo ka mga armado nga kalalakinhan ang nagpadulong sa puluy-an sang biktima.
Nakasunod pa sa mga ini ang tatlo pa ka mga armado nga lalaki.
Natabuan naman nga nagapahuway si Labado sa ila ugsaran sang mag-abot ang mga suspetsado kag ginpamangkot ini kun siya si Dionesio Labado Jr.
Sang ini ang mag-ako, gilayon naman ini nga ginguyod kapin 20 metros ang kalayuon gikan sa ila puluy-an kag didto na ginluthang.
Nahibaluan nga kaupod man sini sa balay ang iya nga asawa kag bata, apang ginpasulod ang mga ini sa ila puluy-an.
Si Labado ang nakaangkon sang isa ka igo sang bala sa ulo.
Gilayon naman nga nagpalagyo ang anom samtang ginhingagaw pa dala sa ospital ang biktima, apang ini ang gindulaan na sang kabuhi.
Ginturn-over naman sang asawa ang isa ka basiyo sang 45. calibre pistol nga nakuha sini sa crime scene.
Suno kay Tampos, lunsay mga armado ang anom ka mga suspetsado.
Si Labado ang isa ka mangunguma kag wala man ini sang record may kaangtanan sa mga gamo sa ila barangay kag wala man sang record sang bayolasyon sa kapulisan.
