Nakarekord ang Office of the Civil Defense (OCD) sang 53 ka mga lugar sa walo ka mga rehiyon nga ginbaha bangud sa bagyo.
Ginpahayag ni OCD officer-in-charge Rafaelito Alejandro IV, narekord ang pagbaha sa mga lugar sa Ilocos Region, MIMAROPA, Bicol Region, Western Visayas, Central Visayas, Zamboanga Peninsula, Soccsksargen kag Caraga.
Suno man sa isa ka opisyal sang OCD, 26 pa ka mga lugar ang nagapabilin nga ginabaha.
57 naman ka mga dalan kag anum ka mga taytay ang apektado sang Bagyong crising.
Samtang, ginkumpirmar sang Office of Civil Defense (OCD) nga may tatlo na ka mga indibidwal nga na-report nga missing kasunod sang malain nga tyempo dala sang bagyo Crising kag Southwest Monsoon ukon Habagat
Suno kay Alejandro IV, duha sa mga missing ang nagikan sa Antique kun sa diin ginapahayag nga nagakatulog ang mga ini sa ila nga balay sang magbaha.
Samtang, may isa man ka tawo nga nadula sa Palawan matapos nga nagpadulong sa baybay apisar nga malain ang panahon.
Sa karon, nagdangat na sa masobra 215,000 ka mga indibidwal sa 495 ka barangay sa bug-os nga Pilipinas ang naapektohan sang bagyo Crising kon sa diin kadam-an sa mga ini ang nagikan sa Negros Island Region kag Panay.
Nagapabilin naman sa red alert status ang OCD kag may yara sang 3 million family food packs nga ila ginpain pananglitan magkulang ang suplay sa mga apektado nga local goverment units.
