Nagdangat sa 53 ang successful blood donors sa ginpatigayon nga Dugong Bombo sa Barangay Alicante banwa sang EB Magalona subong nga adlaw.
Pasado alas 08:00 kaina sang aga, pormal nga gin-umpisahan ang blood letting activity sang Philippine Red Cross in partnership sa Bombo Radyo Bacolod kag EB Magalona Municipal Health Office sa Barangay Alicante.
Sa interview sang Bombo Radyo Bacolod kay Glendale Jamile, municipal nurse sang EB Magalona Health Center, nagapasalamat ini sa mga blood donors sang Barangay Alicante bangud tuman ka aktibo sa ila.
Dugang pa sini nga nagapadayon gid ang bloodletting activity sa ila banwa bangud indi luyag sang ila alkalde nga mawad-an sang dugo ang mga tawo nga nagakinahanglan.
Nagpang-agda naman si Jamile sa iban nga mga luyag magdonar nga magpakigbahin sa masunod nga bloodletting activity sa Barangay Tanza, EB Magalona sa Oktubre 17.
Samtang, nagapasalamat naman si Ruby Escalloda, Barangay Health Worker (BHW) sa Barangay Alicante sa Philippine Red Cross kag sa Bombo Radyo subong man sa mga blood donors.
Suno sa iya, madamo gid sang luyag magdonar sang dugo sa ila barangay bangud luyag sang mga ini nga makabulig sa iban kag sa ila man mismo nga kaugalingon.
Nahibaluan nga kada BHW ang gin-require nga magrekomendar sang tag-duha ka mga blood donors.
