Naalarma na ang Commission on Population and Development (POPCOM) sa nagasaka nga numero sang pagbusong sang mga teenagers nga bisan naga-edad pa lang sang napulo katuig kadungan sang pagtawag sang gobyerno sang teen pregnancy nga isa ka “national social emergency.”
Suno kay POPCOM Executive Director Juan Perez III, may yara sang average nga 530 teenagers nga nagabusong tagsa ka adlaw, kag nagapabilin nga mataas sa 500 ang figure humalin sang 2010.
Pinakamataas naman ang narekord sang 2017, kun sa diin narekord sang ahensiya ang 574 teen pregnancies tagsa ka adlaw.
Ginatutukan karun sang POPCOM ang mga nagapang-edaron sang 10-14 anyos kun sa diin may yara sang 50 percent nga pagsaka sa numero sang mga nagabusong humalin sang 2011 nga nadangat sa 2,000.
30-50 naman sini nga numero ang mga ten-year-olds.
Isa sa ginalantaw nga rason diri ni Perez amo ang sexual abuse ukon incest.
Nagligad nga semana sang ginpahayag ni Socioeconomic Secretary Ernesto Pernia nga ang teen pregnancy ang isa na ka “national social emergency” kun sa diin padayon nga nagasaka ang numero.
May yara naman sang epekto sa ekonomiya ang teen pregnancy kun sa diin ang mga young mothers ang nakadulaan sang ₱24 billion to ₱47 billion sa tuigan nga kita bangud sang early pregnancy, suno sa National Economic and Development Authority (NEDA).
Suno kay Perez, ang pag-angkun sang anak sa huben nga edad ang naga-apekto sa edukasyon kag income sang isa ka teenager.
