Gin-evacuate ang 54 ka mga indibidwal ukon 11 ka mga pamilya kasunod sa nagluntad nga engkwentro sa tunga sang gina-alegar remnants sang nadismantle na nga Central Negros One sang New People’s Army (NPA) kag Philippine Army sa Barangay Sag-Ang, La Castellana, Negros Occidental kahapon alas-6:45 sang aga.
Sa interview sang Bombo Radyo kay La Castellana Mayor Rhumyla Nicor-Mangilimutan, gin-evacuate ang mga residente bangod nga malapit ang mga ini sa area nga ginluntaran sang engkwentro.
Suno diri, temporaryo nga ginbutang sa Barangay Hall ang mga pamilya kag suspendido man ang klase sa isa ka buluthuan sa barangay nga malapit sa encounter site.
Ginahulat na lamang ang abiso sang Philippine Army kun clear na ang area agud makabalik ang mga pamilya sa ila nga mga puluy-an kag mapadayon ang klase.
Pahayag ni Manguilimutan, sadtong 1980’s pa may natabo nga pag-pangambush sa area kag ginkakibot sini nga sa karun may yara sang nagluntad nga engkwentro.
Apang, dako man ang pagpasalamat sini sa trabahao sang Philippine Army sa pagmonitor bisan pa sa gamay nga numero sang NPA.
Nakita man mismo sang alkalde nga mahimo nga maka-recruit ang NPA sa area bangod nga malayo sa banwa ang lugar kag mahapos para sa ila ang pag-ingganyo sa mga kabataan.
Mensahe ni Manguilimutan para sa mga miyembro sang NPA, amo nga buligan sang mga ini ang ila kaugalingon samtang yara man ang gobyerno nga magabulig sa ila.
