Arestado ang 55-anyos nga lalaki kadungan sang drug buybust operation nga ginpatigayon sang mga katapo sang Talisay City Police Station sa La Costa Brava Subdivision, Barangay Zone 15, Talisay City, Negros Occidental kagab-i.
Ginkilala ang suspetsado kay Jenifer Aniceta kag residente sang Purok Tumpok, Barangay Zone 15, Talisay City.
Nakuha sa paghinakop sini ang 3 grams sang suspected shabu kag may balor nga kapin P20 mil.
Ginaalegar man nga may kaangtanan si Aniceta sa napatay na nga drug supplier nga si Ramy Poja.
Sa interview sang Bombo Radyo kay Aniceta, ginpanginwala niya nga may kaangtanan siya kay Poja kag indi niya ini himata bangud tumandok siya sang Alimodian, Iloilo kag nakapangasawa lamang sang residente sang syudad sang Talisay.
Aminado man ini nga kilala niya si Poja apang wala sila sang kaangtanan.
Ginpahayag man sini nga sang una, handler siya sang inugbulang nga manok nanday Jimuel Ledesma, Johnny Jalandoni, kag ang anay alkalde nga Lizares.
Wala man siya sang mahimo bangud nadakpan na ini sang mga pulis.
Suno kay Aniceta, nagsugat siya sa hinablos ni Dra. Ibañez apang ginpaparahan na lamang siya sang operatiba apang nakibot lamang siya nga may nakuha na sa iya nga iligal nga druga.
Aminado man siya nga nagaduso sang druga sadtong 1990s apang madugay na ini nag-untat bangud sa iya pamilya.
Luyag man sini nga ipafingerprint bangud indi iya ang iligal nga druga nga nakuha kag willing man ini nga magpadrugtest agud nga mahibaluan nga wala man ini nagagamit.
Samtang ginpahayag naman ni P/Maj. Jigger Gemino, hepe sang Talisay City Police Station nga normal lang nga nagapanginwala ang suspetsado sa isa ka buybust operation.
Apang paathag sini nga nabaklan nila ini sang iligal nga droga sang tinalikdan nga adlaw gani gin-operate.
Panugyan sini, sa korte nalang ipalambot kun ano ang iya nga reklamo.
Pagatan-awon pa man sini kun nakabahin na sa tokhang sang barangay ang suspetsado.
Ginpasalamatan man sang hepe ang mga nagbulig nga pumuluyo agud madakpan si Aniceta, ilabi na ang mga taga-boundary sang Purok Sibucao kag Tumpok.
Madamo na ang nadakpan nagikan sa Purok Sibucao kag ginalantaw nga nagatabok lang sa Purok Tumpok.
Bangod sirado ang dalan padulong sa Purok Sibucao, sa La Costa Brava ini nagtransaksyon.
Suno kay Gimeno, nakabulig naman sa iya nga iligal nga buluhaton ang iya nga trabaho bilang isa ka driver sang tricycle.
Panugyan naman sang hepe sa mga pumuluyo nga nagasulod sa pagbaligya sang droga nga mag-untat na bangod prisuhan ang pinakamanubo nga ila madangatan.
