Nagdangat na sa 555 ang numero sang mga Pilipino nga nakapauli na sa Pilipinas gikan sa Lebanon humalin sang liwat nga nagluntad ang giyera sa tunga sang Israel Defense Forces kag Hezbollah sadtong Oktubre 2023.
525 diri ang mga Overseas Filipino Workers (OFW) samtang ang 30 naman ang mga dependent ukon mga kabataan kag iban pa gid nga miyembro sang pamilya.
Suno kay Atty. Ace Millar, pinuno sang Repatriation Assistance Division sang Overseas Workers Welfare Administration, sabat sang gobyerno ang tanan nga gastos sang mga Pilipino nga nag-avail sang repatriation humalin sa shelter tubtob sa ila pagbyahe papauli.
Apang, sa pihak sang nagasaka nga tensyon sa Lebanon, may yara sa gihapon sang mga Pilipino nga mas ginpili nga magtinir didto.
Wala pa man ginpasaka sa Level 4 ang sitwasyon sa Lebanon kag kinahnaglan na nga magpatuman sang mandatory evacuation.
Makabaton sang P170,000 nga financial assistance ang mga nagpauli nga OFW gikan sa Department of Migrant Workers (DMW), Overseas Workers Welfare Administration (OWWA) kag Department of Social Welfare and Development (DSWD).
