Naretrieve na kaina sang aga ang bangkay sang 56-anyos nga amay nga naanod sa Magsungay River kadungan sang baha kahapon sang hapon.
Ang biktima nga si Rico Mirasol ang residente sang Vanilla Street, Purok Kahirup B, Barangay Mansilingan.
Sa interview sang Bombo Radyo kay Punong Barangay Rodolfo Pico sang Barangay Mansilingan, nagapangdakop sang tilapia ang mga residente sa lugar kadungan sang pag-ulan kahapon apang nagtakas sila sang nagsaka na ang tubig sa Magsungay River.
Ginpahayag sang apo ni Mirasol nga naglumpat liwat sa tubig ang iya lolo bangud luyag sini nga takson ang daludo sang tubig.
Sang nagdako na gid ang bulyada sang tubig, nagtinguha ini nga magtakas apang wala na sang mauyatan gani dalayon ini nga naanod.
Kaina sang aga, naretrieve ang bangkay ni Mirasol sa Purok Calong-Calong, Barangay Singcang Airport.
Aminado naman ang barangay officials nga madamo ang pamalay sa idalom sang Mansilingan Bridge nga ginalakipan sang mga tumandok kag may yara man sang bag-o lang nagsaylo sa lugar.
Luyag sang mga barangay officials nga mahawanan kuntani ang mga pamalay apang indi man luyag sang mga residente nga magsaylo.
Plano ni Pico nga istoryahon ang mga residente kag kun luyag nila nga magsaylo sa relocation site, buligan sila sang barangay nga makaproseso.
