Patay ang 57-anyos nga balo matapos ginbuno sang gin-utangan sini sang baboy sa Sitio Binalon, Barangay Marcelo, Calatrava, Negros Occidental kahapon sang aga.
Ginkilala ang biktima kay Jimmy Miguello samtang ang suspetsado naman amo si Raymond Patajo, 25-anyos kag lunsay mga residente sang amo nga barangay.
Sa interview sang Bombo Radyo Bacolod kay P/Major Roberto Indiape, hepe sang Calatrava Municipal Police Station, ginpahayag sini nga samtang papauli na ang biktima sakay sa iya motorsiklo, ginsundan ini sang suspetsado.
Nagagwa sa inisyal nga imbestigasyon sang kapulisan nga manukot kuntani si Patajo sang utang nga baboy ni Miguello bangud duha na ka semana nga nagapasalig ini nga mabayad.
Suno kay Indiape, naimpito ang suspetsado sa nangin sabat sang biktima sa iya bangud nga ginbuyayaw pa ini siya rason nga iya ini ginbuno gamit ang kutsilyo.
Nakaangkon sang madamo nga pilas sa lawas si Miguello nga gintunaan sang iya gilayon nga kamatayon.
Samtang, boluntaryo naman nga nagsungka si Patajo kag nakahunong na karon sa Calatrava Municipal Police Station.
