Patay ang 57 anyos nga lalaki matapos nga ginlampusan sa ulo samtang nagakatulog sang ginaalegar nga may deperensya sa paminsaron nga suspetsado sa Purok 5 Eligan, Barangay Ermita, Sipaway Island sa siudad sang San Carlos.
Ang biktima ang ginkilala kay Zarlito Recaplaza , isa ka mananagat kag residente sang nasambit nga lugar samtang ang suspetsado naman ang ginkilala nga si Eric Dionaldo.
Sa interview sang Bombo Radyo kay Police Major Ryan Villasario, hepe sang San Carlos City Police Station, nagpahuway ang biktima nga mananagat sa isa ka payag kag ini nagtulog apang hinali lamang ini nga ginlampusan sang suspetsado sa ulo nga gintunaan sang iya kamatayon.
Suno kay Villasario, may yara sang nakakita sa natabo kag nakakilala sa suspek kag amo nga naaresto ini sa pursuit operation.
Wala man sang may nakita nga personal nga rason sa pagpatay kay Recaplaza samtang gina-alegar naman nga may deperensya sa paminsaron si Dionaldo.
