Patay ang 57 anyos nga panday matapos ginluthang sang riding in tandem suspects sa Sitio Core, Brgy. Kumaliskis, sa banwa sang Salvador Benedicto, Negros Occidental sang Biyernes, pasado alas- 4:00 sang hapon.
Ang biktima ang ginkilala nga si Warlito Lodero, residente sang Brgy Igmaya-an sa nasambit nga banwa.
Sa interview sang Bombo Radyo kay Police Major Ellendie Rebusquillo, hepe sang banwa sang Salvador Benedicto, nagatrabaho si Lodero sa isa ka balay apang naggwa ini kag nagsakay sa iya motorsiklo kag amo na nga ginluthang sang duha ka suspek.
Nag-agom sang duha ka igo sa likod si Lodero kag santo sa statement sang mga witness, nagatambay ang duha ka suspek sa area samtang nagahulat sang tsansa nga patyon ang biktima.
Suno diri, gilayon naman nga nalagyo ang mga suspek sa wala mahibaloan nga dereksyon.
Wala naman nakilal-an ang mga suspek bangod nagasuksuk ang mga ini sang facemask, may hood kag may antipara pa.
