Ginkompirmar sang barangay kagawad sang Barangay 13, Bacolod City nga 57 ka mga pamalay sa Purok Boulevard ang apektado sang ginpatuman nga lockdown matapos nga magpositibo sa Covid-19 ang mag-asawa nga registered voter diri.
Suno kay Barangay Kagawad Maylen Asis, ang iban nga mga residente sang Purok Boulevard ang nagaboto sa Barangay 14.
Wala man sang mga residente nga nagreklamo bangud nakahibalo sila sang peligro sang coronavirus.
Suno kay Asis, ang mag-asawa ang wala nakabalik sa ila balay humalin sang nagbata ang misis sa ospital kun sa diin ginpaidalom sila sa swab test.
Indi man sini masiguro kun pila ang kaupod sang pasyente sa balay.
Suno sa kagawad, ginpadulungan mismo ni Vice Mayor El Cid Familiaran kag katapo sang City Health kag ginlockdown ang mga balay.
Natalana naman nga ipaidalom sa rapid test ang mga nakaclose contact sa pasyente.
May yara naman sang mga barangay tanod nga nagabantay sa lugar kun sa diin nagashifting man ang mga ini.
Nakahatag man sang foodpacks ang City government kag natalana naman nga mahatag ang barangay sang foodpacks.
Nagpanugyan man ini nga magtinir sa balay kag bantayan ang mga kabataan kag katigulangan nga indi makagwa sa balay ilabi na ang nagapuyo sa atubang sang balay sang pasyente.
