Padayun pa ang paglagas sang mga kapulisan sa banwa sang Victorias sa Barangay Tanod nga nagluthang-patay sa iya bilas samtang ini ang yara mismo sa atubang sang apat ka tuig sini nga apo.
Sa interview sang Bombo Radyo Bacolod kay Police Lt. Capt. Genus David, hepe sa Victorias City Police Station, ang biktima ang ginkilala nga si Emily Lorega, 58 anyos samtang ang suspetsado ang ginkilala nga si Joselito Sailoc, 54 anyos, lunsay residente sa Hacienda Loreta Chang, Barangay 10, Victorias City.
Nahibaluan nga mag-utod ang asawa sang suspetsado kag ang bana sang biktima.
Sa imbestigasyon, nahibaluan nga alas-7:00 sang gab-i sang Martes sang hinali na lamang nagsulod sa balay ni Lorega ang suspect samtang ini ang yara sa impluwensya sang makahulubog nga ilimnon.
Suno kag David, sang magsulod si Sailoc, ang biktima ang nagapakaon sa iya apat ka tuig nga apo, tubtob nga ang duha ang nagka-argumento.
Bangod magkalapit lamang sang balay, nagpauli kag nagkuha sa cal. 357 magnum revolver ang suspetsado kag ginbalikan ang biktima agud luthangon samtang ini ang yara sa atubang sang bata.
Si Lorega ang nakaangkon sang igo sang bala sa nawala nga dughan.
Ini ang gindala pa sa Victorias Medical Clinic, apang gindeklarar nga dead on arrival.
Sa pagpadulong sang mga kapulisan sa balay sang suspetsado, ini ang wala nakita apang narecover ang gingamit sini nga armas-luthang.
Sa karun wala pa matumod kun ano ang gin-awayan sang duha antes natabo ang krimen.
Panawagan ni David sa sin-o man nga makakilala kag makakita sa suspetsado nga gilayon nga ireport sa Victorias City Police Station ukon sa Barangay Hall sang Barangay 10, Victorias City.
Panindugan sang hepe, nga madakpan man ukon indi ang suspetsado, sila ang magapasaka sang kaso nga murder, bangod positibo nga napamatud-an ang iya nga krimen.
