Patay ang 58 anyos nga tanod matapos ginbuno sang pila ka beses sang 25 anyos nga suspetsado sa Barangay Mansablay, banwa sang Isabela.
Ang biktima ang ginkilala nga si Ruben Teves samtang ang suspek naman ang ginkilala nga si Jason Piojo, lunsay mga residente sang nasambit nga luagr.
Sa interview sang Bombo Radyo kay Police Captain Joseph Partidas, hepe sang Isabela PNP, nanago sa kampo ang suspetsado samtang nagahulat nga maglabay ang biktima, sadto nga nagpauli ang biktima, gilayon ini nga ginbuno sa liog sang suspetsado.
Sang natumba si Teves, ini ginsundan pa gid sang pila ka labo ni Piojo.
Nag-agom sang madamo nga pilas sa nawong ang biktima nga suno kay Partidas, magamay na lang nga bahin ang naga-angot sa ulo kag lawas sini.
Samtang aminado man si Piojo nga iya ginplano ang ginhimo nga pagpatay bangod nga gusto sini magbalaos kay Teves, kun sa diin tuig 2006, ginpatay ni Teves ang amay ni Piojo.
Gani isa pa lamang ka bulan sang nag-abot si Piojo gikan sa Manila, nagplano na ini nga magbalos kay Teves.
Dugang pa sang suspetsado iya gid una nga gintuyo ang pagbuno sini sa liog sang biktima.
Sa karun yara na sa kustodiya sang kapulisan ang suspetsado nga pagasakaan sang kaso sa pagpatay.
