Patay ang 58-anyos nga lalaki matapos ginlabo sang makapila nga beses sa sulod mismo sang iya balay sa Hda. ViIoleta, Barangay Kapitan Ramon, Silay City, Negros Occidental alas-11:15 kagab-i, Marso 22.
Ginkilala ang biktima nga si alyas “Roming” samtang ang suspect amo si alyas “Anding”, 44-anyos lunsay mga residente sang nasambit nga lugar.
Sa interview sang Bombo Radyo kay Police Lieutenant Col. Edison Garcia, samtang naga-inom sang makahulubog nga ilimnon ang biktima, hinali lang nga nag-abot ang suspect sa iya balay kag ginbuno siya sa tiyan.
Gintambagan si Anding sa iya asawa kag nagpauli sa ila balay.
Apang ini ang nagbalik sa balay sang biktima kag liwat nga ginbuno si Roming sang makapila nga beses gamit ang espading.
Ang biktima ang na-igo sa guya kag kamot.
Ginhingagaw pa ini dala sa ospital apang gindeklarar nga dead on arrival.
Samtang, ang suspect naman ang nagpalagyo matapos ang krimen.
Apang pila ka oras ang naglabay, boluntaryo ini nga nagsungka sa nasambit nga barangay kag gindala sa Silay City Police Station para sa nagakaigo nga disposisyon.
Suno kay Garcia, ang biktima kag suspect ang may nakaligad na nga mga inaway nga ginalantaw isa sa mga rason sa natabo nga insidente.
