Patay ang 58-anyos nga lalaki matapos ginlabo sang makapila ka beses sa sulod mismo sang iya balay sa Hda. Violeta, Barangay Kapitan Ramon, Silay City, Negros Occidental alas-11:15 sang gabi sang Lunes, Marso 22.
Ginkilala ang biktima nga si Alyas Roming, samtang ang suspect amo si Alyas Anding, 44-anyos lunsay mga residente sang nasambit nga lugar.
Sa interview sang Bombo Radyo kay PLt Col Edison Garcia, hepe sang Silay City Police Station samtang naga-inom sang makahulubog nga ilimnon ang biktima, hinali lang nga nag-abot ang suspect sa iya balay kag siya ang ginbuno sa tiyan.
Gintambagan si Anding sa iya asawa kag nagpauli sa ila balay.
Apang ini ang nagbalik sa balay sang biktima kag liwat nga ginlabo si Roming sang makapila nga beses gamit ang espading.
Ang biktima ang na-igo sa guya kag kamot.
Ginhingagaw pa ini dala sa ospital apang gindeklarar nga dead on arrival.
Samtang, ang suspect naman ang nagpalagyo matapos ang krimen.
Apang makaligad sang pila ka oras, boluntaryo man ini nga nagsungka sa barangay kag siya ang gilayon nga ginsurrender sa Silay City Police Station.
Suno kay Garcia, ang biktima kag suspect ang may nakaligad na nga mga inaway nga ginalataw isa sa mga rason sa natabo nga insidente.
