Pilason ang isa ka lalaki matapos nga gintiro sang suspetsado sa Hacienda Fe, Barangay Batuan, La Carlota City, Negros Occidental, Domingo sang kaagahon, Disyembre 22, 2024.
Ginkilala ang biktima kay Rolando Paguntalan, 58-anyos, bull cart operator residente sang Mansalayaw, Barangay Nato, La Castellana samtang ang suspek ang ginkilala kay Jessie Tagalo, 59 anyos kag residente man sang Barangay Nato, La Castellana, Negros Occidental.
Sa interview sang Bombo Radyo Bacolod kay Police Captain Rosinie Cabuena, Deputy Chief of Police sang La Carlota City Police Station, nakabaton sila sang tawag sa nagluntad nga shooting incident.
Suno kay Cabuena, gilayon nga ginrespondehan sang mga kapulisan agud nga maverify ang natabo kag nakita nila ang biktima gindala sa Don Salvador Benedicto Memorial District Hospital.
Ginabantayan man sang mga kapulisan ang medical bulletin sang biktima.
Wala naman ang suspek sang mag-abot ang kapulisan gani nagpatigayon sang hot pursuit operation kun sa diin nadakpan man gilayon ang suspetsado.
Suno kay Cabuena, padayon pa ang ila imbestigasyon sa insidente kag wala pa matumod ang firearms nga gingamit bangud wala na sang armas ang suspek sang nadakpan.
Ginpahayag man sini nga wala pa sila sang motibo sa krimen bangud padayon pa ang imbestigasyon sa kaso.
Suno kay Cabuena nga mahimo nga may indi lang paginstindihanay samtang nagainum ang duha rason nga nagluntad ang shooting incident.
