Patay ang 58 anyos nga welder matapos ginluthang sa Hacienda Siason, Barangay Caliban, Murcia, Negros Occidental alas-6:10 kaina sang aga.
Apang nareport ang shooting incident sa Murcia Municipal Police Station alas-6:56 na sang aga.
Ang biktima ang ginkilala nga si Alyas Crispin, 58 anyos, kasado, welder kag residente sa nasambitan nga lugar.
Samtang may duha naman nga wala nakilal-an nga suspect.
Sa inisyal nga imbestigasyon, ginapahayag nga samtang nagalakaton ang biktima sa bahin sang Hacienda Road padulong kuntani sa iya nga trabaho sa Bacolod City, siya ang ginbangga-an sang mga suspects kag ginluthang sang makapila ka beses.
Nakaangkon sang samad ang biktima sa nagkalainlain nga bahin sang iya lawas.
Gilayon naman nga nalagyo ang mga suspect sa wala matumod nga dereksyon, samtang nagapadayun man sa karun ang hot-pursuit operations sang kapulisan.
