Patay ang 59 anyos nga babayi samtang pilason naman ang duha ka menor de edad matapos mabungguan sang Canter Truck sa National Road, Hacienda Aimee, Barangay Tinampaan, Cadiz City.
Sa interview sang Bombo Radyo Bacolod kay Police Lt. Lovella Cordova, deputy chief of police sang Cadiz City Police Station, ang canter truck nga ginamaneho ni Bernard Baldevia, 23 anyos, residente sang Barangay Cabahug, Cadiz City, ang nagabyahe gikan sa Hacienda Avocado padulong sa Brgy Tinampaan proper.
Apang pagdangat sa lugar, nakaangkon sang problema sa iya manibela rasun nga nagwarik ang canter truck sa natuo nga dereksyon kag nagderetso sa isa ka ice cream vendor.
Natabuan naman nga nagabakal ang 59 anyos nga babayi upod ang walo ka tuig nga bata nga himata sini, kag sila ang naarado.
Ang canter truck ang nagderetso pa kag nagbunggo sa isa ka balay.
Gindeklarar nga dead on arrival pagdangat sa Cadiz City District Hospital ang 59 anyos nga babayi, samtang padayun naman nga ginabulong ang 8 anyos nga bata kag 17 anyos nga ice cream vendor.
Yara naman sa kustodiya sang Cadiz City Police Station ang driver sang canter truck.
