Nasapwan nga wala na sang kabuhi ang 59 anyos nga lalaki matapos nga ginkuga sang 22 anyos nga suspetsado sa banwa sang Pontevedra.
Ang biktima ang ginkilala nga si Andres Bautista, 59 anyos, residente sang Barangay San Agustin sa nasambit nga banwa samtang ang suspetsado naman amo si Christian Vincent Andres Bautista, 22 anyos, residente sang Purok Casal-agan Daku, Barangay DSB, banwa sang Pontevedra.
Sa interview sang Bombo Radyo kay Police Lieutenant Darryl Kuhutan, Deputy Chief of Police sang Pontevedra Muncipal Police Station, Marso 16, alas 7:30 sang aga sila nakabaton sang tawag gikan sa isa ka concerned citizen nga naglabay sa area kag nakakita sa nagahamyangon nga bangkay ni Bautista sa kilid sang dalan.
Sa imbestigasyon sang mga kapulisan ang biktima ang nag-upod sa suspect sa pag-inom sang makahulubog nga ilimnon.
Sang papauli na, nagka-argumento ang duha kag amo nga natabo ang insidente sa pagpatay, kun sa diin ginkuga sang suspetsado ang biktima tubtob nga nawad-an ini sang ginhawa.
Suno diri, ila ginpadulungan ang tanan nga kaupod sang biktima sa pag-inom, nga ila nakilala ang suspek sang nakit-an nga may bukol ini kag may mantsa sang dugo.
Dugang pa nga nakit-an ang isa ka pares sang tsinelas sini sa crime scene samtang ang pares naman ang yara sa iya puluy-an.
Sa karun, yara na sa kustodiya sang kapulisan ang suspetsado kag luyag man sang pamilya sang biktima nga pasakaan ini sang kaso.
