Proud ang bata sang single father nga manuglibod sang chicharon sa banwa sang Pulupandan nga isa na siya ka registered nurse kag 5th placer pa sa August-September 2026 Nurses Licensure Examination.
Si Allanah Beatriz Tubal, graduate sa University of Saint La Salle, tumandok sang Pulupandan, Negros Occidental, ang nakakuha sang 91.40% rating.
Sang nagaedad pa lang siya sang duha ka tuig, nagbulagay ang iya mga ginikanan kag nabilin siya sa luyo sang iya amay nga si Allan.
Halin sadto, wala na siya sang komunikasyon sa iya iloy nga may kaugalingon naman nga pamilya sa Iloilo.
Gin-ako ni Tubal nga nahisa siya sa iban nga mga kabataan nga may iloy apang ginhingabunan sang iya amay ang tanan nga kulang sa iya kabuhi.
Sang gamay pa si Allanah, may mga tinion nga nagaupod siya sa iya amay kun sa diin siya nagalibod sang chicharon bangud wala sang mabilin sa iya.
Apang ang tanan nga kabudlay ang ila gin-antos halin sang elementary kag high school kun sa diin nagpanguna ini sa klase kag nakaangkon sang scholarship sa kolehiyo.
Todo suporta ang iya amay nga ginadul-ong ini kag ginasugat adlaw-adlaw bangud wala sila sang galastuhon kun magkuha ini sang boarding house sa Bacolod.
Tanan nga kabudlay ang nabuslan sang kalipay sang naggwa ang resulta sang board exam kag nakasulod si Tubal sa Top 10.
Suno sa iya, “Thank you, Lord” ang mga tinaga nga nahinambit sang iya amay.
Emosyonal ini samtang nagapasalamat sa iya amay nga wala wala nag-untat sa pagsuporta sa iya.
Suno naman sa iya amay nga si Allan Tubal, gintinguhaan niya nga mapatapos si Allanah bangud indi ini gusto nga maagyan man sang iya anak ang kabudlay nga iya naagyan.
Suno kay Allan, gusto kuntani niya nga makaeskwela sa kolehiyo apang wala sila sang galastuhon.
Bisan magasto ang kurso nga Nursing, wala nag-quit si Allan sa pagsuporta sa iya anak.
Suno sa iya, nagalibod ini sang chicharon bisan gab-i na agud mapatakas ang ila kinahanglanon.
Nagpasalamat naman ini sa iya pamilya kag sa tanan nga nagbulig sa iya sa tion nga kabos ang iya kwarta.
Ginpasalig naman sini kay Allanah nga yara lang ini sa iya tupad kag nakahanda nga magsuporta sa masunod niya nga handom.
