Arestado ang anom ka persona sa asod-asod nga drug buybust operation nga ginpatigayon sa Bacolod City kagab-i, Biyernes Santo.
Una nga napatigayon ang drug buybust operation sa Purok Langis, Barangay Banago, Bacolod City alas-6:15 sang gab-i kun sa diin naaresto ang isa ka 27 anyos nga lalaki nga ginkilala nga si Alyas Part, single, residente sa lugar.
Si Part ang newly identified drug personality kag ini ang wala pa sa Barangay Anti-Drug Abuse Council (BADAC) list.
Ang operasyon ang ginpatigayon sang Bacolod Police Station 3, kun sa diin narecover ang apat ka sachet sang suspected shabu kalakip na ang buybust item.
Kasunod nga nagpatigayon sang drug buybust operation ang Bacolod Police Station 4 sa Purok Cheriza 2, Barangay 27, Bacolod City alas-6:38 kagab-i.
Ang subject person ang ginkilala nga si Joel Juele alyas Toto, 38 anyos, single, wala sang trabaho kag residente sa lugar.
Narecover gikan kay Juele ang pito ka sachet sang suspected shabu kalakip na ang buybust item.
Ang suspected shabu ang ginabanta nagabug-at sang walo ka gramos kag may street value nga P54,400.
Tatlo naman ka persona ang naaresto sa drug buybust operation nga ginpatigayon sa Purok Paghidaet, Brgy Tangub, Bacolod City alas-9:06 kagab-i.
Ang operasyon ang ginpatigayon sang Bacolod Police Station 8 kag ang nagkaladakpan ang ginkilala nga sanday Mark Recodo, 25 anyos; Mark Anthony Paguntalan, 32 anyos kag Jonel Adlawan, 27 anyos, lunsay residente sa lugar.
Nakuha sa ila paghinakop ang duha ka elongated kag duha ka big sachet sang suspected shabu kalakip ang buybust item.
Ang suspected shabu ang ginabanta nagabug-at sang 11 gramos kag may standard drug price nga P74,800.
Samtang arestado man ang tricycle driver sa drug buybust operation nga ginpatigayon sa Purok Torecampo, Brgy. Cabug, Bacolod City alas-11:13 kagab-i.
Ang operasyon ang ginpatigayon sang Bacolod Police Station 9 kun sa diin naaresto si James Espital, 27 anyos, residente sang Prk Katipunan, Brgy Cabug, Bacolod City.
Narecover sa iya paghinakop ang anom ka sachet sang suspected shabu kalakip ang buybust item.
Ang ginapatihan illegal nga droga ang ginabanta nagabug-at sang anom ka gramos kag may standard drug price nga P40,800.
Ang anom ka naaresto ang lunsay natalana nga mangatubang sang kaso sa paglapas sa Republic Act 9165 ukon Comprehensive Dangerous Drugs Act of 2002.
