Ginlatag sang anom gikan sa 15 nga mga kandidata para sa Miss Bacolod Masskara 2023 sa Good Morning Philippines sang Bombo Radyo Bacolod kaina ang ila tagsa ka mga adbokasiya.
Paghatag sang prayoridad sa ikaayong lawas ilabi na sa mga kababaihan ang isa sa mga adbokasiya sang mga kandidata sa Miss Bacolod Masskara 2023.
Suno kay Marianel Tan, candidate no.4, ang adbokasiya sini amo ang pagkahatag sang nagakaigo nga impormasyon angot sa Polycystic ovary syndrome (PCOS).
Suno kay Tan, madamo sang mga babayi sa karun nga nagasuprer sang PCOS kun sa diin nagahatag ini sang kabudlayan sa mga kababaihan.
Suno sa kandidata, ginalantaw sini nga ang Miss Bacolod Masskara 2023 ang dako nga platform agud nga malatag sini ang iya nga adbokasiya kag mangin palaagyan agud nga mapalab-ot sa mga pumuluyo ang importansya sa paghangop sang kondisyon sang mga babayi nga may yara sang PCOS.
Suno diri, indi lang dapat mangin super city ang ciudad sang Bacolod bangud dapat mangin healthy city man ini.
Samtang, bata pa lamang ini nagapasakop na ini sa pageant bangud ginapaintra na siya sang iya iloy tubtob nga nadala na niya sa pagdako.
Isa sa mga pageant nga ginpasakupan sini amo ang Miss Pasalamat sa La Carlota City sadtong 2019 kun sa diin nagfirst place ini.
Sa karun, masako na ini sa pagpreparar para sa coronation night sang Miss Bacolod Masskara 2023 kun sa diin ginasiguro sini nga nagakaon sang insakto, nagapahuway kag masami man ini nagabasa.
Indi man ini pabor sa abortion bangud delikado ini para sa mga babayi apang nakadepende man sagihapon sa tawo bangud ang tagsa-tagsa ang may yara sang kinamatarong nga makadesisyon para sa ila kaugalingon.
Ginaduso naman sang isa ka kandidata sang Miss Bacolod Masskara 2023 paagi sa adbokasiya sini ang comprehensive sex education agud malikawan ang teenage pregnancy.
Suno kay Geralyn Joy Basto, ang candidate No. 5 sang Miss Bacolod Masskara 2023, nagapati ini nga ang comprehensive sex education ilabi na sa mga pamatan-on ang makabulig agud nga malikawan ang teenage pregnancy bangud nakita sini nga ang pungsod ang mas labi nagid nagapamigado bangud nagadamo na ang mga tawo ukon over population.
Ginpahayag pa sini nga dapat ang komunidad ang may nagakaigo nga edukasyon angot sa sex education agud nga indi magsuprer ang mga kabataan nga bunga sang teenage pregnancy.
Suno diri, nagapasalamat ini nga nakasulod siya sa screening para sa mga kandidata sa Miss Bacolod Masskara 2023 bangud sa una sini nga pagpaidalom sa screening sang 2022 wala ini nakasulod.
Pareho sang iban indi man ini pabor sa abortion bangud ang bata ang wala man sang sala.
Ginpahayag naman ni Ma. Erica Panganiban, ang candidate No. 13 sang Miss Bacolod Masskara 2023, nga gamiton sini ang social media agud nga ipahibalo sa iban nga bahin sang pungsod ukon sa bug-os nga kalibutan ang mga tourism destinations diri sa ciudad sang Bacolod.
Suno kay Panganiban bangud madamo na ang nagagamit sang social media sa subong nga panahon nagakadapat lamang nga gamiton ini sa mapinuslanon nga paagi.
Suno diri, paagi sa pagpasakop sa nasambit nga pageant, tinutuyo sini nga malab-ot ang sustainable tourism paagi sa social media bangud nakahibalo ini nga ang ciudad sang Bacolod ang may yara sang manggaranon nga kultura kag heritage.
Para naman kay Criswin Claire Sy Espanola, candidate No. 14 sang Miss Bacolod Masskara 2023, tinutuyo naman sini nga I-empower ang mga kabataan nga nagadako nga wala sa luyo sang mga ginikanan.
Suno kay Espanola, kaangay niya, luyag sini nga I-educate ang mga kabataan nga bisan nagadako nga wala sa luyo sang mga ginikanan, indi ini upang agud nga malab-ot ang mga handum.
Suno diri, sa pagpasakop niya sa nasambit nga pageant, luyag sini ipalab-ot sa sosyodad nga wala sang makaupang sa bisan sin-o man nga may dedikasyon sa paglab-ot sa atun mga handom.
Ginpahayag naman ni Janine Cabrillos, Miss Bacolod Masskara Candidate, adbokasiya naman sini amo ang youth empowerment and inclusivity.
Suno kay Cabrillos, luyag sini nga ipakita sa mga pamatan-on nga madamo sang mga oportunidad para sa ila kag isa man sa tinutuyo sini nga ang mga pamatan-on ang may yara sang dako nga papel para sa ikauswag sang sosyodad.
Suno diri, nagapati siya nga ang mga kabataan nga dako ang mahimo sa pagbag-o sang bwas-damlag sang pungsod.
Suno kay Cabrillos ang mga kabataan ang dapat nga mahatagan sang lugar kun sa diin mapakita sang mga ini ang masarangan nila nga mahimo para sa kauswagan sang pungsod.
Suno naman kay Alona Nejar, candidate No. 6 sa Bacolod Masskara 2023, adbokasiya sini sa pagpasakop nasambit nga pageant ang pagtudlo sa mga kababainhan nga mangin confident.
Suno kay Nejar, nakita sini nga kinahanglanon gid ang women empowerment kag pagpatubo sang self confidence sang mga kababaihan bangud isa ini ka factor sa atun pagpangabuhi.
Suno diri,indi malikawan nga mga batok sang criticism apang mga babayi ang kinahanglan nga mangin confident kag ipakita sa mga kritiko nga sala ang mga ini sa pagkilala sa iya kaangay lamang sini nga nakabaton man sang kritisismo.
Gani sa pagbalik sini sa entablado paagi sa pagpasakop sa Bacolod Miss Masskara, ipakita sini niya nga masarangan niya ang pagpasakop sa nasambit nga pageant.
