Duha ka pamilya ang nadakpan sang Bacolod City Emergency Operations Center (EOC) nga nagagamit sang peke nga vaccination card, kalakip na diri ang isa ka pastor.
Suno kay Em Ang, executive director sang EOC, anom tanan ang ila nga mga nagkaladakpan nga nagagamit sang peke nga vaccination card sa SM City Bacolod.
Pahayag sini nga ang isa ka pamilya ang residente sa Barangay Mandalagan, kun sa diin kalakip diri ang isa ka pastor.
Suno kay Ang, nagtukod ang mga ini sang Help Desk sa SMX convention center agud nga mangin mahapos na sa mga Bacolodnon ang pagkuha sang vaccination certificate kag Bakuna Card nga may-ara sang QR Code nga masami ginakuha sang mga naga-abroad.
Ginpahayag sang EOC Executive Director nga nagdangop sa ila ang pastor kag ang duha ka kaupod sini agud kuntani nga magpangayo sang vaccination certificate.
Apang antes mahatagan sang vaccination certificate, requirement naman ang pagpakita sang vaccination card.
Suno kay Ang, sang gintsekyar na ang vaccination card, natukiban nga wala sa ila nga system ang vaccination number nga nabutang.
Samtang natabuan man nga yara sa vaccination center ang nurse nga nakapirma sa vaccination card, gani ila naman ini nga ginverify kag napamatud-an nga lain man ang pirma.
Sa una, ang pastor kag ang duha sini ka kaupod ang nagapanindugan pa nga matuod ang ila vaccination card, apang sang mapamatud-an na nga peke, nag-ako man ang mga ini nga ila nabakal ang vaccination card sa balor nga P700.
Pahayag sang pastor nga wala ang mga ini nagapati sa bakuna gani sila ang unvaccinated apang kinahanglan sang mga ini nga magpadulong sa abroad.
Sa ulihi, nagdesisyon nalang nga magpabakuna ang tatlo sa nasambit nga mall agud nga makadayun sa paggwa sa pungsod.
Samtang ang tatlo ka iban pa nga nadakop man bangod sa pag-uyat sang peke nga vaccination card ang nagpahayag nga ginbaligya ini sa ila sa balor nga P1,000.
Ang tatlo ang residente sa Barangay Singcang-Airport, Bacolod City.
Pahayag sang mga ini nga ginpasalig sila nga iga-encode sang nurse ang ila nga data gikan sa peke nga vaccination card, gani ila man ini nga ginpatihan.
Pasalig ni Ang nga may Philippine National Police (PNP) Personnel na nga naka-assign nga amo ang magadakop sang mga nagapeke sang vaccination card kag vaccine certificate.
Pahanumdom ni Ang, nga indi dapat magpinsar nga mashort cut ang mga requirement ilabi na nga ang vaccination certificate ang QR coded.
Dugang pa sini nga ang madakpan sa kaangay nga buluhaton ang mahimo mapriso kag magmulta.
