Pito ka balay ang nahalitan kadungan sang sunog nga nagluntad sa Purok Sawmill 3, Barangay Bata, ciudad sang Bacolod kaina sang udto.
Santo sa report sang Bacolod City Fire Station, nagsugod ang kalayo alas-12:39 sang udto kag nadeklarar nga fire out ala-1:19 sang hapon.
Sa kabug-usan, anom ka balay ang totally-damaged samtang isa naman ang partially damaged.
Suno sa mga residente, nagsugod ang kalayo sa balay ni Jenny Castillo nga natabuan nga wala sang tawo bangud sila ang nagatrabaho.
Bangud human sa light materials ang mga balay kaangay sang coco lumber kag plywood, madasig lang nga naglapta ang kalayo, ilabi na nga mabudlay sudlon sang mga bombero ang lugar bangud makitid ang dalan.
Suno kay Marie Quibol nga nagadayon sa lugar, madasig lang ang paglamon sang kalayo sa ila nga balay gani ini ang naupos gid.
Wala naman nasalbar ang ila kagamitan magluas sa TV kag computer nga ginagamit sang iya magulang sa trabaho.
Suno sa isa pa gid ka residente nga si Nelly Edca, napanimahuan sini ang baho sang sunog kag madasig lang naglaton ang kalayo.
Bangud mabudlay sudlon sang bombero ang lugar, nagbayanihan nalang sanday Edca agud nga mabasyahan sang tubig ang kalayo.
Santo sa report sang Bacolod City Fire Station, P250, 000 ang balor sang damage nga ginbilin sang sunog.
