BACOLOD CITY-Patay ang anom ka bulan nga bata sang ini ang malumos sa balde sa Libertad Public Market, Brgy. 40 ciudad sang Bacolod kaina sang kaagahon.
Alas-2:47 kaina sang kaagahon sang gindeklarar nga dead-on-arrival (DOA) sa Corazon Locsin Montelibano Memorial Regional Hospital ang biktima nga si Liana Mae Aloro sang Lizares Extension, Brgy. 40.
Sa nakuha nga impormasyon sang Bombo Radyo Bacolod, nagatulog ang pamilya sang bata sa sulod sang ila stall sa merkado kag wala natalupangdan nga nagkamang ang biktima kag nahulog sa balde mga alas-2:00 sang kaagahon.
20-30 minutos pa ang nakaligad sang natalupangdan sang amay nga yara na sa sulod sang balde ang bata apang nagapalanggit-om na ini kag nagahabok ang tiyan.
Sa interview kay Manang Lucky, tindera sa Libertad Market nga tupad sa stall sang mag-asawa, una ulo ang pagkahulog sang bata sa balde.
Gilayon nga gindala sa hospital ang bata sa hospital apang gindeklarar ini nga DOA.
