BACOLOD CITY — Anom naman ka deep wells ukon bubon ang ipakutkot sang Bacolod City Water District ukon BACIWA bilang short-term solution sa kakulang sang tubig samtang wala pa nakasupply ang bulk water supplier.
Sa forum may kaangtanan sa status sang water supply sa Bacolod kahapon, ginpahayag sang general manager sang BACIWA nga si Engr. Mario Macatangay nga 20 milyones pesos ang pondo sa nasambit nga proyekto.
Natapos na ang bidding para diri kag padayon sa karon ang post-qualification sa kumpaniya nga Cenian nga amo ang lowest bidder matapos nga nabuksan ang ila nga financial envelope.
Suno kay Macatangay, ini ang sabat sa kakulang sang tubig samtang wala pa ang bulk water supply nga magatubod pa sa bulan sang Oktubre.
Apang suno sa general manager, sa bulan sang Oktubre man magamit ang mga deep wells.
Nahibaluan nga sa 60 ka mga bubon sang BACIWA subong, 57 lamang diri ang operational.
Ang forum kahapon ang gintambungan sang mga opisyal sang city government sang Bacolod, mga opisyal sang BACIWA kag sang bulk water supplier kag mga pumuluyo sang ciudad.
