Nakaluwas ang anom ka miyembro sang isa ka pamilya matapos mastranded kag nasudlan sang tubig ang ila ginasakyan nga motor banca sa kadagatan nga sakop sang Brgy Molocaboc Island, Sagay City, Negros Occidental alas-12:10 kahapon sang udto.
Ang mga biktima ang ginalakipan nanday Mammer Pellipas, 43 anyos; Mariza Pellipas, 40 anyos; Maricar Pellipas, 23 anyos; Mark Pellipas, 18 anyos; kag duha kag isa ka tuig nga kabataan, lunsay mga residente sang Sitio Bakwitan, Brgy Molocaboc, Sagay City.
Ang motor banca ang nagkulob bangod sa mabaskog nga pagbalod sa kadagatan sang Molocaboc Island, kag ang insidente ang namonitor paagi sa facebook live ni Ra Ci Ram Escamos, nga nagpangayo sang bulig.
Gilayon man nga nagresponder ang personnel sang Coast Guard Clearing Oupost Vito gamit ang motor banca gikan sa Vito Port.
Apang padulong pa lamang sa area, ginkumpirmar ni Emilyn Yangyang, residente sang Sitio Diot, Brgy. Molocaboc Island nga narescue na ang anom paagi sa motor banca nga ginapanag-iyahan nanday Anton Bais kag Rosenie Pialogo.
