Pilason ang anom ka sultero matapos maaksidente ang duha ka motorsiklo sa Araneta Street, Brgy Tangub, Bacolod City, sa atubang sang isa ka BPO company alas-4:00 kaina sang kaagahon.
Sa impormasyon sang Bombo News Team, ang parehas nga motorsiklo ang nagabyahe padulong sa sur nga dereksyon.
Nauna ang motorsiklo nga ginamaneho ni Danniel Jagocoy, 22 anyos, samtang angkas sini si Justin Arsua, 18 anyos kag isa ka 16 anyos nga ginkilala lamang nga si Alyas Kean, lunsay residente sang Prk Paghidaet, Brgy Taloc, Bago City.
Nagasunod naman diri ang motorsiklo nga ginadala ni Alyas Charles, 17 anyos, samtang angkas sini si Christian Tolentino, 18 anyos kag John Philip Parcon, 19 anyos.
Si Charles kag si Christian ang parehas nga residente man sa parehas nga lugar sa nauna nga motorsiklo, samtang si John Philip ang residente sang Buen Pastor, Brgy Jerusalem, Cadiz City.
Sa impormasyon gikan sa Traffic Enforcement Unit sang Bacolod City Police Office.
Hinali nga nagslide sa highway ang una nga motorsiklo, samtang sila ang nabungguan sang kasunod nga motorsiklo, gani palarehas nga nag-angkon sang samad ang tanan nga sakay sang duha ka motorsiklo.
Ang duha ka motorsiklo ang parehas nga wala sang plate number, samtang wala man sang naka-helmet sa parehas nga motorsiklo.
Ang mga biktima ang gilayon man nga gindala sa Regional Hospital.
