Anom ka mga persona ang patay kag indi magnubo sa apat ang pilason sa pagkasunog sang isa ka pension house sa syudad sang Bacolod subong nga Martes sang kaagahon.
Pasado alas-4:00 sang kaagahon sang nasunog ang Java Pension House Bacolod ukon ang anay Bascon Hotel sa corner Gonzaga-Locsin Streets.
Ginapahayag nga indi magnubo sa 40 ka mga tawo ang nakacheck in sa pension house sang matabo ang sunog.
Pila sa mga ini ang mga estudyante sa Bacolod, mga turista, mga foreigner nga negosyante kag mga taga-Negros Occidental nga mapa-check up kuntani sa Bacolod subong nga adlaw.
Bangud sa pag-ibwal sang madamol nga aso, ang iban nga mga guest ang napilitan pa nga magsaka sa rooftop. Bangud sini, naggamit sang boom crane ang Bureau of Fire Protection kag fire volunteers agud maluwas ang mga tawo nga yara sa ikalima nga panalgan sang building.
Nangin makahalawat-hawat ang rescue operation bangud sang naluwas ang duha ka bata sa rooftop, amo man ang pagsugod sang kalayo sa ila ginhalinan.
Suno kay Fire Chief Inspector Publio Ploteña, fire marshal sang Bacolod, naglab-ot sa 5th alarm ang sunog nga nagakahulugan nga nagbulig ang mga firetruck sa kaiping nga mga banwa kag ciudad.
Sa karun, ginahibalo pa sang BFP kun ang ano gintunaan sang kalayo.
Apang sa pahayag sang isa ka pedicab driver sa Bombo Radyo Bacolod, nagsugod ang sunog sa ground floor. Ginpahayag sini nga may yara sang tatlo ka mga persona nga nagsulod sa hotel kag nagkuha sang helmet, ginsunog kag ginhaboy sa sulod sang hotel.
Suno naman sa isa ka empleyado sang pension house, nasunog ang isa ka motorsiklo sang upholstery store sa idalom sang building.
Sa pag-usisa sang mga otoridad, ang anom ka mga nagkalamatay ang ginalakipan sang tag-iya nga si Christopher Java, anak sini nga si Miguel, 12 anyos; iloy nga si Magdalena; yaya nga si Ronalyn Dacalio; front desk/cashier nga si Arnold Filomeno kag isa ka wala pa na-identify.
