Indi magnubo sa anum ka indibidwal ang ginbawian sang kabuhi kag 21 pa ang pilason matapos gintay-og sang duha ka linog ang Peru, suno sa civil defense sang pungsod.
Santo sa National Seismological Center sang Peru, nag-igo ang mga linog sang Sabado sang gab-i sa probinsya sang Chupaca sa rehiyon sang Junin.
Narecord ang una nga linog sa magnitude 5.6 samtang ang ikaduha magnitude 3.7 suno sa European-Mediterranean Seismological Centre.
Ginpahayag ni Luis Vasquez, hepe sang National Civil Defense Institute sang pungsod, base sa pauna nga report, may yara sang kapin 48 ka mga balay ang totally damaged, 18 naman ka iban pa ang naguba.
Ginabanta yara sa 300 ka mga residente ang naapektuhan kag nagapuyo sa mga trapal nga tent bilang temporaryo nga tululugan.
Kadam-an sa mga pamalay sa mga apektado nga komunidad sa Chupaca ang human sa adobe blocks ukon daan na nga mga materyales rason kun ngaa mas nangin bulnerable ang mga ini sa halit sang linog.
Gilayon naman nag-responder ang mga rescue personnel kag bumbero sa mga apektado nga lugar agud magpatigayon sang search and rescue operation sa mga apektado nga lugar.
Ma-locate ang Peru sa Pacific Ring of Fire, isa ka sona nga responsable sa dako nga bahin sang aktibidad sang linog sa bug-os nga kalibutan.
