Nasapwan nga patay na ang isa ka 60-anyos nga lalaki sa sulod sang isa ka buho nga iya mismo ginkutkot sa Barangay Punta Mesa banwa sang Manapla kahapon.
Sa impormasyon nga nakuha sang Bombo Radyo Bacolod, ginkilala ang biktima kay Nestor Esquilito.
Nagagwa sa inisyal nga imbestigasyon nga alas-8:00 sang aga sang ginsugo ni Abner Jardeleza si Esquilito nga magkutkot sang buho agud himuon nga basurahan.
Mga pasado alas-9:00 sang aga, nakit-an pa sini ang biktima nga nagakutkot apang sang mga alas-12:00 na sang udto wala na si Esquilito.
Gindumdom ni Jardeleza nga nagpauli lang ang biktima kag nagpanyaga.
Apang, pagka-hapon sang ginkadtuan niya ini, nakita na lamang ni Jardeleza nga nagabaruro na sa buho si Esquilito.
Ginhingagaw pa ini dala sa balay-bululngan apang gindeklarar nga dead on arrival.
Sa karon, ginahibalo pa kun ano ang ginkamatay sang biktima.
