Gin-turnover sa kapulisan ang ginabanta 60 grams sang suspected shabu nga na-recover sa isa ka kampo sang tubo sa Purok Lower Baras, Barangay Bantayan, Kabankalan City, Martes sang gag-i, Nobyembre 10.
Sa interview sang Bombo Radyo Bacolod Police Lieutenant Col John Ganzon, Chief of Police sang Kabankalan City Police Station, ginpahayag nga nakit-an sang isa ka concerned citizen ang isa ka sling bag sa katubuhan.
Sa iya pagtsekyar sang unod sang bag, nakita sini ang makaduluda nga mga heat-sealed transparent plastic sachet nga may unod nga crystalline substance.
Ang nadiskubrehan nga bag ang gilayon gindala sa kapulisan kag ila ginkadtuan ang lugar agud usisaon man ang palibot.
Sa inventory sang otoridad, nakuha ang 13 ka sachets sang ginapatihan shabu nga may kabug-aton nga 60 grams kag may standard drug price nga P408,000.
Suno kay Ganzon, wala pa sang may nag-claim sang nasambit nga bag kag duda man ini nga may mag-ako nga sila ang nagapanag-iya sini.
Suno diri, ila man ginalantaw ang posibilidad nga may kaangtanan ini sa illegal drug transactions sa mga boundary area, kun sa diin ginapatihan nga may gakatabo nga pagbaylohanay sang iligal nga droga.
