61 sa 142 ka mga water refilling stations sa Bacolod City nga namonitor sang City Health Office ang nadiskubrehan nga wala sang sanitary kag business permit.
Suno kay Dr. Grace Tan, head sang Environmental Sanitation Division sang CHO, sa ila pagpanglibot sa mga water refilling stations sa ciudad, 142 ang ila na-inspect kun sa diin 81 ang may yara sang nagakaigo nga permit samtang 61 ang wala.
Suno kay Tan, sa 61, iban diri ang nagaproseso pa lamang sang ila mga permits.
Suno diri, sila ang nagalaom nga magapadulong sa CHO ang mga ini agud magpakolekta sang ila water samples agud mapadala sa laboratoryo kag makasugod na sila proseso.
Suno sa iya, ila gin-abisuhan ang mga water refilling stations nga wala permit nga temporaryo anay nga indi mag-operate ukon magbaligya sang tubig bangud kun may magwa nga problema, sa ila man gihapon magabalik.
Aminado si Tan nga indi sila otorisado nga magpasira bangud iya ini jurisdiction sang City Legal office apang santo sa mga ordinansa apang ginrekomendar sini nga indi anay mag-operate ang mga water refilling stations tubtob nga sila ang makasecure sang permit.
Sa karun 142 pa lamang ang ila nalab-ot nga mga water refilling stations bangud kulang ang mga ini sa personnel kag wala man ang CHO sang exact nga figures kun pila ang mga naga-operate sa ciudad.
Gin-athag man sini nga negatibo sa cholera ang gin-alegar pasyente sang nasambit nga balatian sa Barangay Mansilingan apang padayon ini nga nagapahanumdum nga magpractice sang insakto nga hygiene kag tsekyaron ang mga pagkaon agud malikawan ang kontaminasyon.
